PAMA POLITIK BA MALAYSIA
Kitai bisi ninga berita ke madahka gerempung katak diatu nyau udah sedia deka ngaga undang-undang ka ngasuh bala katak ke diau ba Malaysia pindah ngagai menua bukai.
Siti ari kebuah bala gerempung katak ngaga utai bakatu laban, reputasi enggau nama bala katak udah jaik lalu berita nadai ngetu-ngetu bejaik sida. Sida ia ngarap sepengudah sida pansut ari Malaysia, lalu mai bala lalat agai utai ke bau ianya politik ba Malaysia. Katak mega jelu ke digaga petara lalu siku ari jelu ke ulih nulung mensia ngurangka penyakit ke datai enggau dibai ari lalat. Tang, nama katak jaik laban katak nyau dikaitka enggau politik kamah ke nyadi ba menua Malaysia laban bala katak tu ya ke ditemu kitai, jelu ke engkechit enti bejalai.
Katak ianya siti leka jaku ke selalu dikena urang ngangauka wakil rayat ba Malaysia ke engkechit agai parti politik ke bukai laban deka ngulihka duit. Maya sida engkechit, sida mengkhianat bala pengundi ke udah meri mandat ngagai sida ngambika nyadi wakil sida ba parlimen enggau ba dewan undangan negeri. Diatu, kitai nemu reti leka jaku katak tu ianya siti pengkhianatan laban deka nguntung ka diri empu aja. Siti ari gaya pengkhianatan ke paling dikeji ianya maya wakil rayat tu engkechit ari parti laban ke bulih duit juta ringgit enggau bulih pangkat tinggi baka bulih gelaran“datuk”.
Parti Sarawak Bersatu (PSB) udah lama di cap siti ari parti ke penuh enggau katak. Utai ke disangka urang tu enda betul enggau utainya semina jaku petenah. Tang GPS, munsuh politik PSB pechaya enti jaku petenah nya disebut enda ngetu-ngetu, bala pengundi ia ke enda tentu nemu reti politik ba Sarawak, kelebih agi ngagai sida ke diau ba luar bandar, pechaya PSB tu ianya parti katak ke enda ulih dipechaya. Enda ulih dikelalai ka, endang bisi siku katak ari PSB. Katak nya engekechit pansut ari PSB lalu mindah agai rumah katak ke paling besai di menua Sarawak. Sepengudah ia mindah, ia pen lalu diberi pangkat besai ari DUN biasa lalu nyadi menteri muda ba dalam kabinet perintah GPS.
Ngambika kitai ulih ngelala sapa katak ke bisi ba Sarawak, kitai deka mansik pekara tu enggau pulai baru agai sejarah Sarawak dalam 34 bulan ke udah.
Barisan Nasional alah maya bepilih kali ke-14 kena bulan mei 2018. Sepengudah pengawa bepilih ambis, Pakatan Harapan nyadi perintah persekutuan ke baru ba Malaysia. BN tekenyit enggau utai ke nyadi laban sida nadai kala berunding sida deka alah maya bepilih kali ke-14 nya. Menteri enggau sapit menteri sida maya perintah BN ke diketuai Najib nyau nyadi ahli parlimen biasa lalu nadai agi ngembuan keistimewaan. Tang, sepengudah 22 bulan , sida ia nyau pulai baru megai kuasa ianya nyadi perintah laban ke udah pandai bemain enggau siluk-biluk politik Malaysia.
Sepengudah PH tumbang lalu PN nyadi perintah, bala sida BN ari Sarawak nyerauh laban kelalu gaga ati, diatu, sida dikumbai kitai Gabungan Parti Sarawak (GPS). Enda mukai-mukai, pintu ke mai penyenang ngagai sida tebuka baru ianya chara sida engkechit, baka ke digaga sida ngelama tu. Anang kitai enda ingat, ulah ke digaga sida tu mai penusah besai agai rayat menua Sarawak. Keterubah ia, Parti Islam Se-Malaysia (PAS) nyau nyadi sebegian ari perintah pusat Perikatan Nasinal (PN). Urang Sarawak ke ukai Islam diatu nyau mula mayar rega katak GPS ke belanda nuju PN, tang ngagai katak nya, nya semina pekara mit enggau enda penting endar ke ulih meri penusah agai rayat sarawak nitih ke runding sida.
Kelimpah ari Fadillah, Datuk Alexander Nanta Linggi mega dilantik nyadi Menteri Perdagangan Dalam Negeri enggau Hal Ehwal Pengguna, Datuk Seri Dr Wan Junaidi Tuanku Jaafar nyadi Menteri Pembangunan Usahawan enggau Koperasi serta Datuk Seri Nancy Shukri nyadi Menteri Pelancongan, Kesenian enggau kebudayaan. Kempat-empat sida tu ari parti PBB, ianya parti paling besai dalam gabungan negeri.
Sapit menteri ari GPS ianya Datuk Hanifah Hajar Taib (portfolio Hal Ehwal Sabah enggau Sarawak ba Jabatan Perdana Menteri), Datuk Seri Tiong King Sing (Perpaduan Nasional), Hasbi Habibollah (Pengangkutan), Datuk Aaron Ago Dagang (Kesihatan) serta Datuk Henry Sum Agong (Pembangunan Luar Bandar) '
Senarai tu gambaran penguntung duit ke dulih sida ka nyadi sebegian ari perintah persekutuan Malaysia :
1. Senat (Dewan Negara): RM11,000
2.Rumah Perwakilan (Dewan Rakyat): RM16,000
Dalam nya mega, enti sida megai jawatan ba perintah, tiap-tiap anggota parlimen Malaysia mega bulih gaji bulan-bulan nitih ke pangkat ba dalam perintah tauka eksekutif ke dipegai sida : Anggota Pentadbiran, gaji bulanan :
1. Perdana Menteri: RM22,826.65
2.Pegawai Perdana Menteri: RM18,170.20
3. Menteri: RM14,907.20
4. Menteri Bertugas: RM8,847.65
https://www.therakyatpost.com/2019/12/27/just-how-much-do-malaysian-lawmakers-earn/
Sida madah, rayat ba menoa Sarawak mayuh bulih penguntung tang sampai diatu mimit pen kitai nadai meda tanda rayat Sarawak bulih penyenang ari ulah sida ke engkechit .
Andau Batang Lupar ke berega RM 848 juta patut ia dibayar penuh ari sida perintah pusat. Tang, diatu, kitai meda perintah GPS Sarawak ke mayar ngaga andau nya. Menteri persekutuan ke betanggungjawab ngaga andau nya datai ari GPS. Jaku tanya ngagai sida, nama sida enda minta perintah persekutuan PN mayar rega ngaga andau nya deh? Nambah mega, beratus iti sekula ke udah buruk ba sarawak nadai mega dikemaju. Kami rayat Sarawak udah nganti kemaya sarawak deka bulih lesen TELCO, baka ke udah disebut kepala menteri Datuk Patinggi Abang Johari, SKMM ke udah besetuju meri lesen TELCO ngagai sarawak. Tang, jaik nasib, nyentukka diatu, nadai usaha ke digaga lalu penatai internet ba luar bandar Sarawak agi nadai berubah.
Diatu, kitai bisi megai lis katak ke engkechit enggau nemu penyampau penatai pemisi sida ninting bulan. Ari nya, kitai ulih madah ka sida nya engkechit lalu dikumbai kitai katak politik. Enggau penyampau penguntung nya, nyamai ni-ni parti ya deka meli bala katak-katak tu enggau meri bala katak duit ke umbas ya maioh.
Ahli Parlimen PSB (MP enggau ADUN) ngasai nasib ke enda sama enggau nasib bala sida ahli parlimen enggau DUN GPS. Yb Baru Bian, Ahli Parlimen Selangau ianya Menteri Kerja Raya ba perintah PH. Tang, laban ke ia urang ke megai prinsip tinggi enggau semampai bediri teguh ba landasan moral ke tinggi, ia enda engkechit maya perintah PH tumbang sepengudah 22 bulan megai perintah lalu mulai kediri nyadi ahli perlimen biasa aja. Presiden PSB, Dato Seri Wong Soon Koh ianya Menteri Perdagangan Antarabangsa enggau E-commerce negeri serta menteri kewangan ke-2. Maya ia ninggal ke BN ( diatu ke dikumbai kitai GPS) lalu ngaga parti PSB, ia nyau mulai kediri nyadi ADUN biasa lalu nadai ngembuan hak istimewa.
Sepengudah nuan meda tauka nemu pekara tu enggau silik, nuan patut nemu sapa katak politik kebendar ya .
Nama nuan agi ka katak tu nyadi wakil menua nuan ba dewan undangan negeri maya PRN ke enda lama agi ka digaga tu ila? Enti nuan enggai, tolong meh diri empu dulu. Anang ngundi GPS. Lari nuan jauh ari katak ke nyeruga ngacau pengidup kitai.
No comments:
Post a Comment