Bajet Negeri Sarawak 2022 enggau Ruang Bilik B40 - Bisi Mai Mai Pengarap Ngagai Ruang Bilik B40?

Bajet Negeri Sarawak 2022 enggau Ruang Bilik B40 - Bisi Mai Mai Pengarap Ngagai Ruang Bilik B40?

Bala ADUN GPS ke balat nunduk, lebih-lebih agi sida ke nunduk ari PBB muji bajet 2022 ke dibantai KM Abang Johari penapat inat. Jaku sida madah manah ungkup menua pesisir, ungkup rayat, sida ba menua pesisir enda ditinggal enggau jaku bukai disebut ngapa tang nadai reti.

Statistik Bantuan Sara Hidup (BSH) ungkup taun 2022 mantaika bisi 443, 000 ruang bilik B40 ba Sarawak. Penyampau tu makai 63% ari semua ruang bilik ba Sarawak, enti kita deka nemu, bisi 2.8 juta rayat nengkani menua Sarawak diatu.

Dikena nulong ruang bilik B40 maia pandemik Covid19, ari bulan Mac 2020 nyentukka kitai masuk Plan Pemulihan Nasional ba bulan Oktober 2022, perintah Sarawak udah nyediaka 7 pakej bantu ke dikumbai pakej Bantuan Khas Sayangku Sarawak (BKSS). Sebengkah ari bantu dalam pakej BKSS 1- BKSS 6 nya bantu duit sepenyampau RM 500. Bantu tu diberi enggau terus ngagai ruang bilik B40.

Pakej BKSS mega bisi disengkaum dalam bajet negeri Sarawak 2022. Sepenyampau RM285.47 disediaka dalam pakej tu tang sekali tu, nadai bantu duit diberi ngagai ruang bilik B40. Bantu duit amat beguna lebih agi nyau ka taun baru nembiak besekula ba 2022 ila. Taun baru 2022 siti ari pun taun ke merinsa ngagai ruang bilik B40 laban deka bebelanja lebuh buka sekula.

Nama kebuah perintah GPS ngambi jalai enda meri bantu duit ngagai ruang bilik B40 dalam bajet 2022? Tusah ungkup ruang bilik B40 deka ngelaban ‘norma baharu’ enggau sida mega dijangka patut diberi bantu dalam awak 6 bulan ketrerubah ba taun 2022.

Ba plan strategij ke-4 bajet 2022, bisi jaku madahka kerajaan Sarawak deka ngubah enggau ngemajuka rayat menua pesisir enggau pengawa betanam betupi menua pesisir. Salah siti ari objektif nya deka nyadika Sarawak pengeksport pemakai ba taun 2030.

Ba taun 2030, Sarawak diarap nyadi negeri ke maju.

Duit sepenyampau RM134 juta udah diberi dikena ngagai objektif tu tang bisi tanda madahka sepemagi besai duit tu deka dikena ngaga agropark ba siti-siti alai aja. Tanya iya, bakani deka mai ubah ngagai rayat menua pesisir enggau ekonomi menua pesisir deka datai enti nadai duit khas kena nyapai tuju tu? Ruang bilik B40 bisi ba semua alai ba Sarawak, ukai semina ba Spaoh, tauka ba Serikai tauka ba Sadong Jaya aja.

Ari penyampau RM1.18 billion ke disediaka tu, berapa ke dikena ngaga jalai raya ke nyambung jalai ari bandar ke bandar? Utau tu enda disebut ba dalam bajet 2022. Enti nadai jalai raya ke manah, susah ungkup orang bekebun ba menua pesisir deka bulih pemanah ari asil kebunm sida. Enti nadai pejabat betanam betupi perintah, susah ungkup orang bekebun menua pesisir bulih penemu enggau pemintar bekaul enggau chara betanam ke manah. Enti nadai subsidi ari perintah, bakani orang bekebun deka ngelaban rega asil kebun sida ke enda tentu nya? Nadai jaku dipansut bekaul enggau penusah tu ba dalam bajet 2022. Nyadi, nama kebuah sida uduk GPS madahka bajet Sarawak 2022 tu bajet pemadu manah deh?