DUN vs Balai Raya- GPS Ngaga Diri Enda Nemu Utai.

 DUN vs Balai Raya- GPS Ngaga Diri Enda Nemu Utai.

Bisi siti pekara ke bangat ngasuh kitai maioh runding, utai ke nyadi nya tadi nyau udah ngikis utai ke benama demokrasi ia ke udah diperandau serta udah diberi sida jaku pemutus. Belanja Negeri Sarawak 2022 nyau udah dikemendarka maya sida ngaga gempuru berandau ba balai raya (BCCK), lalu maya sida ya ngerandau ke nya, mimit pan sida nadai belaban jaku tauka belaban penemu. Enti kitai berati, gempuru randau ke digaga sida nya nadai reti, ka bebaka sida berandau ba kedai ngupi aja. Kengka nya, bisi ga keduak orang ke ba kedai kupi nya ninga serta meda randau ruai ia ke ditusi tauka dipadah Abang Jo ngagai bala sida ADUN GPS ia ke bekait enggau belanja nya tadi.

Kitai endang  sigi nemu, laban ke menoa Sarawak tu tadi benung ditinggang penusah ianya benung Darurat, belanjawan tu tadi nyau dikemendarka pia aja enggau mudah lalu nadai nerima randau ari orang bukai. Utai ke nyadi tu semina salah siti ari pemilih ke dua iti, pemilih ke bukai ianya Yang Dipertuan Agung ngambika meri pemendar ngambika majlis khas DUN dipejalaika ungkup tuju ti sama.

Nama kini runding tauka ajar ngagai orang Sarawak ari utai ke nyadi serta pekara tu endang ngemaluka kitai Sarawak? Nyadi, runding enggau ajar ngagai kitai, ianya: Perintah ulih ngaga pengawa peneka ati ngagai kitai lalu, salah ari, utai ke digaga sida nya nadai mai penyenang ngagai kitai, sida semina enggau sesenang madahka menua kitai tu darurat lalu nangguhka DUN serta semina ngaga pemutus utai ke beguna bendar ba balai raya, dikena sida ngeluluska pemendar ari utai ke deka digaga sida.

Kelimpah ari nya, bisi siti pekara agi ke beguna ianya, maya 12 Oktober 2021, Menteri Pelancongan, Kesenian dan Kebudayaan, Dato Sri Abdul Karim Rahman Hamzah madah, musin bepilih nyau deka datai enda lama agi.

Kitai sama bela nemu, DUN nyau enda buka laban menoa kitai benung diberi perintah Darurat 2021, ia ke dikumbai ulih ngurangka penyakit ke ngerekai tauka dikena ngelak Kelompok DUN Covid-19 nyadi. Kitai mega nemu, bala sida Ahli Dewan Undangan Negeri ianya orang keterubah ia ke dicucuk vaksin Covid-19. Nambah mega, enggau SOP ia ke dititih ripih, DUN patut ia nyadi endur ke pemadu selamat lalu pengerai sida mega ulih disebut kitai dijamin. Nya meh kebuah, amat alit ati maya sida madah, sida enda ulih membentang tauka bejaku pasal belajawan ba DUN.  Kebendar ia, sida endang sigi ngelak deka bejakuka pasal belanja nya laban belanja nya kebendar ia deka diguna sida GPS ungkup utai bukai ngambika sida menang maya PRN-12 ila lalu ulih nyadi megai perintah baru.

Siti pekara ke bekait enggau belanjawannya ia ke terang dipeda kitai, lalu kitai nemu reti kini kebendar ia sida nguna nya ianya laban deka nagih tauka minta sukung ari pengundi-pengundi baka ngaga bantuan khas ngagai bala sida penjawat awam negeri serta penjawat awam persekutuan Sarawak. Pemjawat awam negeri kenu ko deka diberi bantu nyampau sebulan setengah gaji. Enti kitai manding, ruang bilik B40 semina nerima RM500 ari pakej BKKS ia ke udah. Tang, taja pia, ba BKKS 8.0, ruang bilik B40 nadai diberi agi. Dalam nya mega, kitai ninga orang ke positif Covid-19 ninting ari nyau udah nurun ngagai  834, sebedau tu ke semampai ba renggat 4 iti lumur. Jaku mudah, GPS nyau udah sedia diri dikena sida nempuh PRN-12 ia ke dijangka sebdau bulan 12 2021, lalu mega sida deka ngilakka gelombang undi 18.

Aram meh rayat Sarawak, aram kitai sama angkat lalu dani. Perintah GPS, perintah ia ke enda betanggungjawab. Nya alai, kitai mesti besatu ati ngelaban parti tu ngambika sida enda enda menang lalu enda ulih ngaga perintah baru ba taun baru tu ila. Ba ke penudi tu, sida ia semina bejalaika macama chara pengawa laban ke deka menang. Amat tambab kitai enti kitai agi deka makai umpan ari sida- Mata ginti, garis enggau umpan ke tenggelam, enti kitai agi ngelakka utai nya nyadi.