Laluh Kayu 2021: Angkat Enggau Dani Kitai Anak Sarawak

 Laluh Kayu 2021: Angkat Enggau Dani Kitai Anak Sarawak

Tugung laluh kayu ke bisi ayan ba alan dampih enggau dam HEP Baleh ke ayan ba malam 20hb Ogos 2021 lalu udah direpot ba surat kabar kena ka 22hb Ogos 2021 udah narit orang maioh, ukai semina rayat dalam negeri tang mega luar negeri, Aku deka nyebut tasah ke nyadi tu dalam nama tuggung laluh kayu 2021 tauka episod 2021. Kebuah bakatu laban maia Oktober 2010 ba Sarawak mega kala nyadi utai ke sama ba alan enda jauh ari Baleh mega. Penusah tu deka dikumbai aku episod tuggung laluh kayu 2010 tauka episod 2010.

Perintah negeri patut udah belajar enggau ngambi penemu ari episod 2010. Udah nya, sida patut ngeringka pengawa bejalaika undang-undang ngambika laluh tuggung kayu enda larat ba sungai agi dudi ari ila. Tang, perintah negeri, ke dipegai GPS enda ngaga utai ke patut. Nama kebuah? Ba taun 2010 kelia, sida ke diau ba menua nya berasai takut lalu ngaga pengawa miring ‘muji menua’ dikena nyuruh bala Petara badu ringat ngagai sida ke diau ba pelilih menua nya. Engka perintah mega pechaya ngagai pengawa nya lalu berunding Petara enda nganu agi lalu penusah bakatu enda nyadi agi sepengudah pengawa miring tu digaga. Nya alai, perintah nadai ngaga nama-nama ke patut ngambika episod 2010 tu enda nyadi agi ba taun dudi ila.

Ngambi ka bala ke macha ulih nemu enggau cherita lebih silik agi, latar cherita deka dipadah ba artikel tu. Utai tu deka nyuruh bala ke macha meda utai ke sama entara episod 2010 enggau episod 2021 lalu meda penusah ke diberi kedua-dua episod tu.

Episod 2010 nyadi ba Sungai MElatai. Sungai Melatai tu pati Batang Baleh. Batang Baleh tu pati ari Batang Rajang, sungai ke pengabis panjai ba Sarawak. 

Episod 2021 mega nyadi ba Batang Balh. Sekali tu, ia nyadi ba ulu Sungai Mengiong, dampih enggau HEP Baleh. Munyi je udah disebut tadi, ai Batang Baleh anyut ngagai ai Batang Rajang. 

Kedua-dua kes laluh tuggung kayu ke nyadi ba taun 2010 enggau 2021 tu ngujungka pengerusak ke amat besai. Orang maioh ke diau ba Batang Baleh enggau Batang Rajang enda ulih nengah jalai lalu sungai mega enda selamat ditengah. Dalam episod 2010, bisi repot ke madah (enda ulih disah) bisi nembiak parai laban apai indai iya enda ulih mai ngagai Sepital Kapit. Laluh tuggung kayu ka ba sungai maia nya nyuruh perau dikena sida enda ulih bejalai nengah tuggung kayu nya. Dalam episod 2021, penatai ai ba bandar Sibu bisi teputus. Operasi ba loji ai Lembaga Air Sibu diketuka end lama laban ai ke bangat kamah laban bisi tekang tanah enggau laluh-laluh utai ari tuggung kayu nya. Sarawak Energy, kompeni ke ngaduka dam HEP Baleh mantaika pengirau ati senentang enggau penusah ke dibai laluh kayu ke larat ba sungai ke ulih ngeruga pengelantang dam sida iya. Sapit Kepala Menteri Tan Sri James Jemut Masing madahka pengawa laluh kayu tu bepun ari lekapan berat ba sungai, laban pengawa nebang kayu ke besai nyadi ba ulu Batang Baleh ulih ngelemika struktur dam lalu ngujungka dam nya enda selamat dikena. 

Utai ke nyadi tu meri penusah ngagai pengelikun pengidup mensia maioh ke diau ba sepanjai Batang Baleh enggau Batang Rajang. 

Sama enggau episod 2010, pengawa balak ke besai-besai enggau ujan lebat ke panjai ngujungka laluh kayu ba kawasan balak nya anyut ke sungai. Utai tu ngujungka bisi laluh kayu betuggung ba sungai. Tanya iya ba ditu, nama sida ke bekuasa ba perintah negeri enda ngabi jalai ke patut dikena nyeliahka benchana tu nyadi. Nama kebuah pengawa balak ba kawasan ulu Sungai Baleh enda diketuka?

Tanya lumur 1 ke patut ditanya suba nya dini alai Pengarah Jabatan Perhutanan Sarawak maia nya, Datuk Len Talif sepengudah episod 2010 suba. Nitihka repot, sekeda pengawa nebang kayu ba SUngai Baleh udah diketuka bepun ari taun 2007. Utai ke nyelai sereta nyuruh ati kitai alit nya jawasan nebang kayu tu diau ba DUN Baleh lalu YB ba kawasan nya ukai ornag bukai tang James Jemut Masing empu. 

Lebuh pengawa miring digaga ba Sungai Melatai ba bulan Nov 2010 kelia, James Masing pen bisi datai.

Bisi jaku mulut madahka dua iku orang besai dalam perintah enggau kroni GPS ngembuan ‘kepentingan’ ba kawasan Sungai Baleh din, sida ngembuan lesen balak enggau lesen ngambi kayu belian. Dipadahka mega, lesen masuk ngagai ‘coupe’ dikena bejalaika pengawa balak ba luar sereta enda irauka atur ke udah ditetapka dikena nyaga alam sekitar enggau pemanah kampung udah dikereja balak. Enti semua orang bedau nemu agi, ornag ke patut disalah senentang enggau pengawa tu nya perintah GPS empu, ke bepun ari Perbadanan Kemajuan Perusahaan Kayu Sarawak. Enti kita bedau nemu, Sapit Kepala Menteri 2 Menua Sarawak mega Menteri Sumber Asli ianya Awang Tengah meh orang ke megai kuasa nya. Ia menteri ke megai tanggul pengawa dalaam ngemajuka pengawa kayu tu. Rayat Sarawak bangat pedis ati meda menteri sida ke enda ulih mutarka penyai ke nyadi tu. 

Dinga kita nembiak Sarawak, enti kita bedau dani lalu meda penyai GPS dalam megai Sarawak, diatu meh maia ke betul kita semua dani. Perintah GPS udah ‘fail’ dalam pengawa bejalaika utai ke patut. Anang meri sida peluang agi megai menua tu laban utai nya mai penusah ngagai kitai aja.