Pembalakan & Babas/ Hutan Yang Ditanam ba Bahagian Kapit ( Bahasa Iban)

Pembalakan & Babas/ Hutan Yang Ditanam ba Bahagian Kapit

Kena 6hb Feb 2021, Kepala ke megai Sarawak Dayak Iban Association (SADIA) bisi mansut ke jaku ba media senentang pekara ka bekait enggau tanah adat laban tudah ka minta kasih agai kompeni balak ka bisi megai lisen nanam kayu (LPF) ngambika sida bertanggungjawab agai orang ke ngempu tanah adat (NCR) kelebih agi ngagai sida ke bempu tanah ka dipasukka sida dalam lisen LPF.

SADIA minta kasih amat agai sida kompeni ka megai lesen LPF ngambika sida mantaika ulah ke manah serta nemu ngasai bertanggungjawab ianya enggau chara mayar sewa agai tanah NCR ka diguna sida ka dipasukkan ba dalam lisen LPF ngena chara salah ( nadai inggar) ka digaga sida pihak bekuasa lalu nyau digasak/dichuri sida kompeni ka bisi  megai lesen  LPF. Maya bejaku ba media mega, SADIA bisi meri jaku bejaga-jaga nuju sida bala kompeni ke nyau makin majak deka encheruboh tanah NCR dayak .Enti nitih, ukai sida SADIA ke patut meri jaku bakanya ngagai kompeni, tang kebendar ya sida Menteri Pembangunan Bandar enggau sumber Asli ke patut mansutka jaku nya lalu nagang serta nyaga tanah adat dayak. Menteri tu meh kebendar ia betanggungjawab ngeluluska ni bagi kompeni ka minta lisen ngambi kayu balak enggau meri lisen LPF. Diatu, menteri tu dipegai Awang Tengah Ali Hassan. 

https://www.theborneopost.com/2021/02/06/sadia-concerned-about-ncr-land-encroachment/

Industri balak enggau Industri ke baru ianya industri kelapa sawit udah lama dikumbai mai penusah serta mai pemerinsa agai idup kelebih agi agai bangsa dayak enggau orang ulu ka diau ba pedalaman sarawak.

Proses perintah GPS (suba dikangau Barisan Nasional)  ke ngeluarka lisen balak ianya siti proses ke amat sulit ( penuh rahsia)  lalu nyentukka diatu maklumat nya nyau dilalai ka sida ya laban mayuh lisen ke udah dipansutka sida, pemayuh serta penyampau tanah, rampa menua diatu nyau udah digundul ka sida ia magang, pekara tu amat nyelai lalu ngasuh mayuh orang nyau tusut runding kelebih agi ngagai sida ke bempu rampa menua ianya orang asal Sarawak empu. Bangsa Dayak enggau orang Ulu ke jauh diau ba pedalaman Sarawak nemu utai nya dekan nyadi lalu sida semina meda bala sida piko/kobi , lipan ka datai ari kompeni LPF serta orang ke enda dikelala sida nyau encherubuh tanah NCR laban ke endur sida betanam ka sawit. Sebedau nya mega, sida udah nemu penusah ke deka datai agai sida laban sida meda sungai enggau rampa menua ka nyadi penatai pemisi (pemakai) nyau musnah lalu jelu mega nyau majak punas.

Siku ari menteri bangsa Dayak kala madah, rampa menua nyau baka pasar ke alai endur ngalu bagi sida dayak, orang Ulu enggau kaum Penan ke diau ba pedalaman Sarawak.

http://www.theborneopost.com/2012/11/28/folly-to-rush-change-for-penans/

Kena bulan 1 2015, rayat Sarawak bisi nemu pasal maklumat ka bekait enggau lisen balak ka dipansutka perintah negeri Sarawak maya Tan Sri Adenan Satem ke agi nyadi kepala menteri : Penyampau 572 iti lisen balak ke dikemedarka temasuk lisen ngambi kayu tebelian enggau 155 occupation ticket.

https://www.thestar.com.my/News/Nation/2015/01/21/Sarawak-CM-plans-to-halve-number-of-OT-licences/

Occupation Ticket nya dikena ngaga ladang kelapa sawit.

Ba Kapit, munyi ka dipadah sida SADIA, diatu nyau bisi 11 iti kompeni LPF. Tiap- tiap LPF nya udah diberi pajak pengelama 60 taun.Tu reti ya bagi sapa ke bisi megai lisen LPF ulih ngaga ladang sawit ba endur sida sepemanjai 60 taun. Nitih utai ke  dipadah SADIA, kesemua lisen LPF tu makai tanah pemesai 1 juta hektar. Sebagian besai ari kawasan nya ianya Kapit. Kawasan Kapit nya diatu dipegai 2 iku menteri dayak ke ukai semina bepangkat tinggi enggau megai pengaruh besai, tang seduai ia mega sigi orang ke datai ari menua kapit.

https://forestry.sarawak.gov.my/page-0-486-1009-Progress-of-Planting.html

Jerita industri balak enggau industri kelapa sawit ba Kapit tu tadi citi jerita ke amat meri penyinu agai kitai dayak. Tu meh jerita pasal rayat ke behempas pulas bejuang deka nyaga pengelikun menua lalu milih wakil rayat, tang wakil rayat ke dipilih sida diatu nyau udah melakang ka sida baru baka jaku sempama “ ngarap ka pagar, pagar makai padi” enggau “ kaban makai kaban”.

Keni utai tu ulih nyadi lalu ninggang sida bangsa dayak enggau orang Ulu ba kawasan pedalaman Sarawak lalu utai tu nyadi lalu nadai nemu putus-putus? Pemerinsa idup bangsa dayak enggau orang ulu tu bepun ari perintah GPS ( suba ke dikangau kitai Barisan Nasional) ngeluarka lisen balak peneka ati, diatu lalu nambah ke ladang kelapa sawit.

Keistimewaan tu diberi agai sida nengah klausa ( jaku ke ditulis ba bup undang-undang) 26 ke bisi ba peraturan Hutan ( Rampa Menua) 1997. Nengah Klausa nya tadi,  pelabur dikemendarka ngemansang 20 % endur belisen, ianya kelapa sawit sepemanjai 25 taun ngambika pelabur bulih penguntung enggau masa ke pandak agi.  Nitih ka runding sida, pelabur ke udah kala melabur ba kawsan nya sigi diberi duit lebih. Bagi sida pelabur baka kompeni LPF, sida ka melabur nya tadi baka ngelombong emas ke ulih tumbuh baru. Ba jaku hokkien, utai tu disebut orang “ Chiek beh Liau”.

Nama utai ke patut digaga sida bangsa Dayak enggau orang Ulu senentang pekara ke nyadi tu?  Udah tentu sida ukai semina ulih bediri dedegi meda ngapa enggau sembahyang ngambika bala pemegai perintah serta penyukung sida ba industri balak enggau ladang kelapa sawit bisi ngasai pengasih enggau penyiru meda sida ke ditindas? Utai nya semina ngasuh CM Abang Johari lalu membuktika senentang pekara ke disebut ia ke kala viral ba media sosial kena 2/2/2021 nya betul.

https://www.facebook.com/100002474958275/videos/3697854240307038/

Siti utai ka patut digaga bangsa dayak enggau orang Ulu ianya sedar, utai ke ngasuh sida merinsa enggau penusah ka nuntung bepun ari pengawa ke digaga sida perintah GPS. Sida perintah GPS tu endang rangka/ bam lalu sida  dayak enggau org Ulu ke agi nyukung GPS ngasuh perintah GPS nyau gaga agi ngerja pengawa jaik. Amat nadai pechaya, kitai bisi 2 iku orang dayak ke megai pangkat pengambis besai ba perintah ke diatu, tang mayuh orang dayak ke diau ba bandar mayuh merinsa laban sida ke nadai ulih gawa di menua , tanah NCR sida ke dichuri bala sida kompeni. Amat nadai adil bagi kitai dayak digaga baka tu , kelebih agi bangsa dayak empu ke makai kitai dayak.

Nyadi, jaku lalau nuju bangsa dayak enggau orang Ulu : Perintah GPS tu udah nunjuk ke agai kitai senentang sida ia tu sigi perintah ke enda beduli, nadai peduli agai nuan enggau nadai peduli agai generasi biak. Nuju perintah dayak ke megai pangkat besai, nuan bisi untak tang nuan nadai nemu berunding. Semina siti aja chara agai orang Dayak enggau Orang Ulu ke ulih digaga : Anang ngundi GPS maya bepilih ke deka datai tu ila. Beri meh peluang agai nuan empu ngambika nuan bisi masa depan ke lebih manah agi enggau perintah megai menua ke baru.